मोरङ । जिल्ला अदालत मोरङले आज (सोमबार) सनम शाक्य हत्याकाण्ड र ३३ किलो सुन प्रकरणका नाइके चुडामणि उप्रेती उर्फ ‘गोरे सहित ६ जनालाई जन्मकैदको फैसला सुनाएको छ ।

जिल्ला अदालतका न्यायाधीश भरत लम्सालको इजलासले प्रतिवादीमध्ये मुख्य अभियुक्त मोरङ उर्लाबारीका गोरेसहित टेकराज मल्ल ठकुरी, लाक्पा शेर्पा, मोहन काफ्ले, नरेन्द्र कार्की (कृष्ण) र भोजराज भण्डारी (भोजे मामा) लाई जन्मकैदको फैसला सुनाइएको हो ।अन्य दुईलाइ तीन वर्ष र ६ महिना कैद सजायको फैसला भएको अदालतका स्रेस्तेदार टिकेन्द्रवीरजङ्ग राणाले जानकारी दिए ।

अदालतले राजन कुमारलाई तीन वर्ष र मदनप्रसाद घिमिरे (माधव)लाई ६ महिना कैद सजायको फैसला गरेको स्रेस्तेदार राणाले बताए । मुद्दाका ७७ जनालाई प्रतिवादी बनाइएकामा ४८ जनाले सफाइ पाएका छन् भने २१ जना फरार रहेकाले मुद्दा मुल्तवीमा राखिएको उनले बताए ।

जिल्ला अदालत मोरङमा विसं २०७५ वैशाख १९ गते ‘आपराधिक समूह स्थापना र सञ्चालन गरी सुन चोरी पैठारी र चोरी निकासीको अवैध कारोबार, अपहरण तथा शरीर बन्धक र कर्तव्य ज्यान’ शीर्षकमा मुद्दा दायर भएको थियो ।