काठमाडौं – एक एक पाइला नेपालले ताप्लेजुङको फक्ताङलुङ गाउँपालिकामा विषेशज्ञसहितको निःशुक स्वास्थ्य शिविरको आयोजना गर्ने भएको छ । फागुन २९ देखि १ गते सम्म ३ दिन सञ्चालन हुने उक्त शिविरमा सबै प्रकृतिको परीक्षण, उपचार र सेवा दिइने आयोजक संस्थाले जनाएको छ ।

गाउँपालिका र वडा–वडा सँग समन्वय गरेर सञ्चालन गर्न लागिएको उक्त शिविरका लागि यस अघि नै त्यस क्षेत्रमा पुगेका स्वास्थ्यकर्मीले गाउँ–गाउँमा गएर बिरामीको पहिचान गरेको र शिविरमा एक्सरे, ल्याब र सामान्य सल्यक्रियासहितको सेवा दिने एक एक पाइला नेपालमा आवद्ध वरिष्ठ कलेजो रोग विषेशज्ञ प्राध्यापक डाक्टर सुधांशु केसीले जानकारी दिए ।

तापेथोकमा आयोजना हुने शिविरमा २५ सय बढीलाई सेवा दिने लक्ष राखिएको डाक्टर केसीको भनाई छ । उक्त शिविरका लागि ७ लाख बढीको औषधी र उपकरण पठाइसकिएको छ । सो क्षेत्रका बिरामीको सबै समस्यालाई गम्भिर ढंगबाट अध्ययन गरी उपचार गर्ने र जटिल बिरामीलाई सुविधा सम्पन्न अस्पतालमा समेत लगेर उपचार गर्ने लक्ष आयोजकले राखेको छ ।

एक एक पाइला नेपालले मुलुकका दुर्गम–दुर्गम ठाउँमा पुगेर स्वास्थ्यको सहज पहुँच नभएका नागरिकको निशुल्क उपचार गर्दै आएको छ । यस अघि पश्चिमका विभिन्न स्थानमा स्वास्थ्य शिविरको आयोजना गरिएको र पूर्वमानै पहिलो पटक ताप्लेजुङमा यो सेवा दिन लागेको बताइएको छ ।

शिविरमा सबै रोगका साथै आँखासहित नाक, कान, घाँटीको पनि परिक्षण र उपचार हुने छ । शिविरका लागि ल्याब, र एक्सरे मेसिन पनि पठाइसकिएको छ ।