विराटनगर । मोरङको धनपालथान गाउँपालिका – ६ कदमा गाउँमा भएको भीषण आगलागीमा परी दुई बालबालिकाको निधन भएको छ ।

मृतक बालबालिकाको परिचय खुलेको छैन । आगलागीका कारण हाल सम्म ८ घर जलेर नष्ट भइसकेका छन् । चर्को घाम लागेको र हावा चलेका कारण आगलागी नियन्त्रणमा समस्या भएको मोरङ प्रहरीका प्रवक्ता वेदप्रकाश जोशीले जानकारी दिए ।

अहिले प्रहरी, स्थानीय र दमकलको सहायतामा आगो नियन्त्रणमा लिने प्रयास भइरहेको छ । आगलागी कहाँबाट, के कारणले सुरु भयो भन्ने पनि नखुलेको र अनुसन्धान भइरहेको प्रहरीले जनाएको छ । नजिक नजिक रहेका सबै घर जलेकाले अब ८ घर भन्दा बढी घर जल्ने सम्भावना नरहेको घटनास्थलमा रहेको प्रहरीले जनाएको छ ।

२ बालबालिका बाहेक अन्य मानवीय क्षतिको विवरण यो समाचार तयार पार्दा सम्म प्राप्त भएको छैन ।