विराटनगर । कोशी प्रदेशका पूर्व मुख्यमन्त्री राजेन्द्र राईले प्रतिनिधिसभा सदस्यमा निर्वाचित ध्रुव राईलाई बधाई दिएका छन्।
सामाजिक सञ्जालमार्फत प्रतिक्रिया दिँदै उनले श्रम संस्कृति पार्टीबाट विजयी ध्रुव राईलाई बधाई तथा सफल कार्यकालको शुभकामना व्यक्त गरेका हुन्।
राईले आफू, अजम्बर र ध्रुव जस्ता कार्यकर्ताले विगतमा एमाले निर्माणका लागि लामो समय संघर्ष गरेको स्मरण गर्दै अहिले आएर शेरधन राई तथा एमालेविरुद्ध चुनाव लड्नुपर्ने अवस्था आउनु दु:खद रहेको उल्लेख गरेका छन्।
उनले एमालेका लागि धेरैले पसिना मात्र नभई रगतसमेत बगाएको भन्दै वर्तमान अवस्था पार्टी नेतृत्वका कारण आएको संकेत गरेका छन्।
पूर्वमुख्यमन्त्री राईले एमाले अध्यक्ष केपी शर्मा ओलीको नाम उल्लेख गर्दै यस्तो अवस्थामा पुग्नु नेतृत्वका लागि पनि आत्मसमिक्षाको विषय भएको बताएका छन्। “यो बुढेसकालमा यस्तो शर्मनाक पराजय भोग्नु परेकोमा खुसी लाग्दैन,” उनले भनेका छन्।
उनले विगतका गल्तीबाट पाठ सिकेर भविष्यमा कम्युनिस्ट आन्दोलनलाई आदर्श र मूल्य–मान्यतामा आधारित बनाउँदै अघि बढाउनुपर्ने धारणा पनि व्यक्त गरेका छन्।
साथै विश्व शान्ति, वातावरण संरक्षण र सामाजिक न्यायका लागि समाजवादी व्यवस्था आवश्यक रहेको उल्लेख गरेका छन्।
सन्देशको अन्त्यमा उनले प्रतिनिधिसभा सदस्यमा अभूतपूर्व विजय हासिल गरेका ध्रुव राईलाई पुनः बधाई दिँदै सफल कार्यकालको कामना गरेका छन्।