काठमाडौं । नेपाली कांग्रेसले १५औं महाधिवेशनका लागि राष्ट्रिय सभागृहको हल उपलब्ध गराइदिन अनुरोध गरेको छ।

पार्टी कार्यालयका कार्यवाहक मुख्यसचिव कृष्णप्रसाद दुलालले राष्ट्रिय सभागृहलाई पत्र लेख्दै महाधिवेशनका लागि आवश्यक स्थान उपलब्ध गराइदिन अनुरोध गरेका हुन्।

कांग्रेसले आगामी असोज १५ देखि १९ गतेसम्म काठमाडौंमा १५औं महाधिवेशन आयोजना गर्ने निर्णय गरेको छ। महाधिवेशनको तयारी, व्यवस्थापन तथा कार्यक्रम सञ्चालनका लागि असोज १५ देखि २० गतेसम्म ६ दिन राष्ट्रिय सभागृहको प्रदर्शनी हल, लबी, पार्किङ स्थल तथा बगैंचा उपलब्ध गराइदिन पत्रमार्फत अनुरोध गरिएको छ।

‘नेपाली कांग्रेसले आफ्नो १५औं महाधिवेशन आगामी असोज १५–१९ गते काठमाडौंमा आयोजना गर्ने निर्णय गरेको हुँदा उक्त महाधिवेशनको तयारी, व्यवस्थापन तथा कार्यक्रम सञ्चालनार्थ असोज १५ गतेदेखि २० गतेसम्म ६ दिनका लागि कांग्रेस केन्द्रीय कार्यालयको नाममा राष्ट्रिय सभागृहको प्रदर्शनी हल, लबी, पार्किङ स्थल तथा बगैंचा उपलब्ध गराई बुकिङ गरिदिनुहुन अनुरोध गरिन्छ,’ दुलालले लेखेको पत्रमा उल्लेख छ।