विराटनगर । नेपालको स्वास्थ्य क्षेत्रमा डिजिटल प्रविधिको प्रयोग बढ्दै जाँदा विराटनगरका विभिन्न अस्पताल तथा स्वास्थ्य संस्थाहरूले क्लाउडमा आधारित कागजरहित अस्पताल व्यवस्थापन प्रणाली ‘इमेडिवेयर’ प्रयोग गर्न थालेका छन् ।

काठमाडौंस्थित जेन आइटी हबले विकास गरेको उक्त सफ्टवेयरले अस्पतालको दैनिक कार्यप्रक्रियालाई डिजिटल, व्यवस्थित र प्रभावकारी बनाउन सहयोग पु¥याउँदै आएको छ ।

विराटनगरका पारस मल्टिस्पेसियालिटी अस्पताल, दिव्य ज्योति अस्पताल र तपारिया आँखा अस्पताललगायतका स्वास्थ्य संस्थाहरूले इमेडिवेयर प्रयोग गरिरहेका छन् ।

यस प्रणालीमार्फत बिरामी दर्ता, समय निर्धारण, बहिरंग सेवा व्यवस्थापन, बिलिङ, प्रतिवेदन तथा अन्य प्रशासनिक कार्यहरू डिजिटल माध्यमबाट सञ्चालन गर्न सकिन्छ ।

सातै प्रदेशमा सेवा विस्तार गर्ने लक्ष्य
इमेडिवेयरका सञ्चालक राजकुमार श्रेष्ठका अनुसार कम्पनीले नेपालका सातै प्रदेशमा आफ्नो सेवा विस्तार गर्ने लक्ष्यसहित डिजिटल स्वास्थ्य प्रविधिको पहुँच बढाउँदै आएको छ ।

क्लाउडमा आधारित प्रणालीले अस्पतालहरूलाई आफ्नै स्थानीय सर्भर स्थापना र व्यवस्थापनमा पूर्ण रूपमा निर्भर रहनुपर्ने अवस्थालाई कम गर्न सहयोग गर्छ । यसबाट आवश्यक विवरणमा पहुँच, तथ्यांक व्यवस्थापन तथा विभिन्न स्थानबाट प्रणाली सञ्चालन गर्ने प्रक्रिया सहज बन्ने कम्पनीको भनाइ छ ।

श्रेष्ठका अनुसार स्वास्थ्य संस्थाहरूलाई आधुनिक सूचना प्रविधिसँग जोडेर सेवा प्रवाहलाई प्रभावकारी, व्यवस्थित र पहुँचयोग्य बनाउनु इमेडिवेयरको प्रमुख उद्देश्य हो ।

स्थानीय सर्भरको निर्भरता घटाउँदै क्लाउड प्रविधि
कम्पनीकी व्यवस्थापक उन्नति रञ्जितका अनुसार परम्परागत रूपमा स्थानीय सर्भरमा आधारित सफ्टवेयर सञ्चालन गर्दा अस्पतालहरूले सर्भरको मर्मतसम्भार, प्राविधिक समस्या, प्रणालीमा पहुँच र तथ्यांक व्यवस्थापनजस्ता चुनौती सामना गर्नुपर्ने हुन्छ ।

‘नेपालमा क्लाउडमा आधारित अस्पताल व्यवस्थापन प्रणालीको प्रयोग बढ्दै जाँदा स्वास्थ्य संस्थाहरूका लागि प्रविधिको उपयोग अझ सहज बन्दै गएको छ । इमेडिवेयर प्रयोग गरिरहेका अस्पतालहरूबाट प्राप्त सकारात्मक प्रतिक्रिया तथा अन्य स्वास्थ्य संस्थाहरूलाई गरिएको सिफारिसले हाम्रो सेवाप्रतिको विश्वासलाई प्रतिबिम्बित गर्छ,’ रञ्जितले बताइन् ।

उनका अनुसार क्लाउडमा आधारित प्रणालीले अस्पताल तथा क्लिनिकको दैनिक कार्य सञ्चालन सहज बनाउनुका साथै प्रशासनिक व्यवस्थापनलाई प्रभावकारी बनाउन सहयोग पु¥याउँछ ।

एउटै प्रणालीबाट अस्पतालका विभिन्न सेवा व्यवस्थापन
इमेडिवेयर अस्पताल तथा क्लिनिकका विभिन्न कार्यप्रक्रियालाई एउटै डिजिटल प्रणालीमार्फत व्यवस्थापन गर्ने उद्देश्यले विकास गरिएको सफ्टवेयर हो । यसले बिरामी दर्ता, बहिरंग तथा अन्तरंग सेवा व्यवस्थापन, बिलिङ, औषधि पसल, प्रयोगशाला र प्रतिवेदनलगायतका कार्यहरू डिजिटल माध्यमबाट सञ्चालन गर्न सहयोग गर्छ ।

कागजरहित प्रणालीको प्रयोगले कागजी अभिलेखमाथिको निर्भरता घटाउन, आवश्यक विवरण व्यवस्थित रूपमा सुरक्षित राख्न तथा अस्पतालको कार्यप्रवाहलाई थप प्रभावकारी बनाउन मद्दत पुग्छ । एकीकृत प्रणालीबाट दैनिक सेवा सञ्चालन र प्रशासनिक कामलाई व्यवस्थित बनाउन पनि सहज हुन्छ ।

यद्यपि, स्वास्थ्यसम्बन्धी संवेदनशील विवरणको सुरक्षा, गोपनीयता, नियमित तथ्यांक प्रतिलिपि सुरक्षित राख्ने व्यवस्था तथा प्रणालीको निरन्तर सञ्चालन सुनिश्चित गर्नु डिजिटल स्वास्थ्य प्रणालीका महत्त्वपूर्ण पक्ष हुन् ।

नेपालका विभिन्न क्षेत्रमा सेवा विस्तार गरिरहेको इमेडिवेयरले विराटनगरका अस्पतालहरूमा पनि डिजिटल प्रविधिको प्रयोगलाई प्रोत्साहन गर्दै आएको छ । स्वास्थ्य संस्थाहरूमा क्लाउड प्रविधिको प्रयोग विस्तार हुँदै जाँदा कागजरहित स्वास्थ्य सेवा, व्यवस्थित अभिलेख व्यवस्थापन र आधुनिक अस्पताल सञ्चालन प्रणालीको विकासमा सहयोग पुग्ने अपेक्षा गरिएको छ ।