रुकुमपूर्व । भोटेकोशीमा आएको भीषण बाढीमा परी दुई महिनादेखि बेपत्ता रहेका प्रहरी जवान मिलन श्रेष्ठको शव नभेटिएपछि परिवारले कुशको शव बनाएर अन्त्येष्टि गरेको छ।

भूमे गाउँपालिका–३, झुम्लाबाङका २३ वर्षीय श्रेष्ठ रसुवागढी प्रहरी चौकीमा कार्यरत थिए। करिब एक वर्षदेखि उक्त चौकीमा कार्यरत उनी गत भदौ १० गते भोटेकोशीमा आएको भीषण बाढीपछि सम्पर्कविहीन भएका थिए।

बाढीमा बेपत्ता भएलगत्तै परिवारले उनको खोजी जारी राखेको थियो। तर, दुई महिनासम्म पनि उनको अवस्थाबारे कुनै जानकारी प्राप्त हुन सकेन। लामो समयसम्म खोजी गर्दा पनि श्रेष्ठको अवस्था पत्ता लाग्न नसकेपछि परिवारले कुशको शव बनाएर परम्पराअनुसार अन्तिम संस्कार गरेको हो।