काठमाडौँ । हिमालमा जलवायु परिवर्तन तथा भोटेकोशी–त्रिशूली विपद्सम्बन्धी संसदीय विशेष समितिको सभापतिमा राष्ट्रिय स्वतन्त्र पार्टी (रास्वपा) संसदीय दलका नेता गणेश पराजुलीको एकल उम्मेदवारी परेको छ। एकल उम्मेदवारीसँगै उनी सभापति बन्ने निश्चित भएको छ।

सभापति चयनका लागि बुधबार दिउँसो २ बजे निर्वाचन हुँदैछ। पराजुलीको उम्मेदवारीमा नेपाली कांग्रेसका मोहन आचार्य प्रस्तावक तथा एमालेका पुष्पराज कँडेल, नेपाली कम्युनिस्ट पार्टीका रमेशकुमार मल्ल, श्रम संस्कृति पार्टीका ध्रुवराज राई, राप्रपाकी सरस्वती लामा र रास्वपाकी निशा डाँगी समर्थक छन्।

रसुवामा भदौ १० गते आएको बाढीपछि प्रतिनिधिसभाले असोज ५ गते १५ सदस्यीय विशेष समिति गठन गरेको हो। तीन महिनाको कार्यावधि रहेको समितिले हिमाली क्षेत्रमा जलवायु परिवर्तनको प्रभाव, हिमनदी तथा हिमतालमा भइरहेको परिवर्तन, भोटेकोशी–त्रिशूली विपद्को कारण र जोखिम, राहत तथा पुनर्स्थापना र पूर्वचेतावनी प्रणालीबारे अध्ययन गर्नेछ।

समितिले विपद् जोखिम न्यूनीकरण, सुरक्षित पुनर्निर्माण, सीमापार जलाधार सहकार्य तथा आवश्यक कानुनी र संस्थागत सुधारका उपायसमेत सिफारिस गर्नेछ।