काठमाडौं । अमेरिकाको ओहायो राज्यमा नेपाली मूलका व्यवसायी तारा सिन्चुरीको गोली प्रहार गरी हत्या गरिएको घटनाको अनुसन्धानमा संघीय अनुसन्धान ब्युरो (एफबीआई) ले स्थानीय प्रहरीलाई सहयोग गर्ने भएको छ।

फेयरफिल्डस्थित डिक्सी हाइवेमा रहेको ‘एभरेस्ट ज्वेल्स एन्ड क्लोदिङ’ पसलमा अक्टोबर २० मा भएको घटनामा ५२ वर्षीय सिन्चुरीको मृत्यु भएको थियो। प्रहरीका अनुसार लुटपाटका क्रममा भएको घटनापछि जिम्मेवार व्यक्तिको खोजी भइरहेको छ।

अक्टोबर २२ मा प्रकाशित स्थानीय सञ्चारमाध्यम फक्स १९ को समाचारअनुसार एफबीआईले फेयरफिल्ड प्रहरीसँग सम्पर्क गरी अनुसन्धानमा सहयोगको प्रस्ताव गरेको छ। मदिरा, गहना तथा अन्य व्यवसायमा हुने अपराध अनुसन्धान गर्ने संघीय निकाय एटीएफले पनि सहयोगको प्रस्ताव गरेको छ। प्रहरीले अनुसन्धानको थप विवरण भने सार्वजनिक गरेको छैन। दिउँसै पसलमा गोली प्रहार

प्रहरीका अनुसार अक्टोबर २० मा दिउँसो १ बज्नुअघि डिक्सी हाइवे र बोयमेल ड्राइभ नजिकै रहेको व्यापारिक केन्द्रमा गोली चलेको सूचना प्राप्त भएको थियो। घटनास्थल पुगेका प्रहरी अधिकारीले पसलभित्र सिन्चुरीलाई मृत अवस्थामा फेला पारेका थिए।

छिमेकी व्यवसायमा कार्यरत प्रत्यक्षदर्शी एन्डी फिजेनमायरले गोली चलेको आवाज सुनेपछि आफ्ना कर्मचारीलाई सुरक्षित स्थानमा बस्न भनेका थिए। गोली पसलको झ्याल फुटाउँदै नजिकैको कार्यालयको भित्तासमेत छेडेर गएको उनले बताएका छन्।

प्रहरीले घटनास्थल आसपासका व्यवसायबाट निगरानी क्यामेराका दृश्य सङ्कलन गरिरहेको छ। घटनामा संलग्न संदिग्धको पहिचान र पक्राउबारे पछिल्लो सार्वजनिक विवरणमा कुनै पुष्टि भएको छैन। दशैँका बेला परिवारमा शोक

तीन सन्तानका पिता सिन्चुरीको निधनले परिवार, आफन्त र स्थानीय नेपाली समुदायलाई शोकमा डुबाएको छ। उनका भतिजा प्रकाश कालिकोटका अनुसार सिन्चुरी समुदायमा सहयोगी र सामाजिक अगुवाका रूपमा परिचित थिए।

उनका परिवारका सदस्यले दशैँका बेला भएको घटनाले दुःख थपिएको बताएका छन्। सिन्चुरीको हत्या भएको घटनाबारे स्थानीय नेपाली तथा हिन्दू समुदायका सदस्यहरूले दुःख व्यक्त गरेका छन्। प्रहरीको अपिल

फेयरफिल्ड प्रहरीले घटनाबारे जानकारी भएका व्यक्तिलाई अनुसन्धानमा सहयोग गर्न आग्रह गरेको छ। सूचना दिन चाहनेले प्रहरी सार्जेन्ट ब्रायन कार्नेसलाई ५१३–८६७–६००५ वा फेयरफिल्ड प्रहरी विभागलाई ५१३–८९६–८२०० मा सम्पर्क गर्न सक्नेछन्।