ताप्लेजुङ । ताप्लेजुङमा रहेको प्रसिद्ध तीर्थस्थल पाथीभरामा केबलकार निर्माणको कामले गति लिएको छ ।

हाल बटम स्टेसनको काम भइरहेको र कामलाई थप गती दिन निर्माण कम्पनी हिमालयन कन्स्ट्रक्सन ताप्लेजुङका सामाग्री त्यस क्षेत्रमा पुगेको कन्स्ट्रक्सनका प्रमुख इन्द्र केदेमले जानकारी दिए ।

प्रमुख केदेमका अनुसार १५ महिना भित्र निर्माण सम्पन्न गर्नेगरी काम भइरहेको छ । पाथीभरा मन्दिरसम्म पुग्ने केबलकार निर्माणको गत कात्तिक २३ गते शुक्रबार शिलान्यास गरिएको थियो ।

संविधानसभा सदस्य डम्बरध्वज तुम्बाहाम्फे र फुङलिङ नगरपालिकाका नगरप्रमुख अमिर मादेनले केबलकार निर्माणको शिलान्यास गरेका थिए ।

पाथीभरा केबलकार कुनै एउटा कम्पनीको मात्र नभएर यो समग्र ताप्लेजुङ जिल्लाको आर्थिक, सामाजिक र सांस्कृतिक विकाससँग जोडिएको, र ताप्लेजुङ तथा समग्रमा कोशी प्रदेशकै आर्थिक समृद्धिको कोशेढुङ्गा बन्ने नगरप्रमुख अमिर मादेनको भनाई छ ।

उनका अनुसार पर्यटन प्रवर्द्धन, रोजगारी सिर्जना, वातावरणीय सन्तुलन र आर्थिक तथा सामाजिक विकासका लागि केबलकार लाभदायक बन्नेछ ।