ताप्लेजुङ । प्रतिनिधिसभा निर्वाचनका लागि नेकपा (एमाले) ताप्लेजुङले एमाले उपमहासचिव योगेश भट्टराईसहित ५ जनाको नाम प्रदेश र केन्द्रमा सिफारिस गरेको छ ।

शनिवार बसेको जिल्ला कमिटी बैठकले योगेश भट्टराई, तिलकुमार मेन्याङ्वो, छितिज थेबे, टंक आंबुहाङ लिम्बु र भीमा ओझाको नाम सिफारिस गर्ने निर्णय गरेको कार्यवाहक अध्यक्ष दिपेन पोमुले जानकारी दिए ।

उनीहरूको नाम प्रदेश र केन्द्रीय कमिटीमा सिफारिस गरिएको हो । प्रतिनिधिसभा निर्वाचनका लागि एउटा मात्रै निर्वाचन क्षेत्र रहेको ताप्लेजुङबाट ५ जनाको नाम सिफारिस भएपछि अब प्रदेश र केन्द्रमा नामका विषयमा छलफल भई निर्णय हुने छ ।

यस अघिका निर्वाचनमा ताप्लेजुङबाट योगेश भट्टराई उम्मेदवार भएर निर्वाचित भएका थिए ।