विराटनगर । मोरङको विराटनगर महानगरपालिका क्षेत्रमा फेला परेको एक शंकास्पद वस्तुलाई नेपाली सेनाको टोलीले सुरक्षित रूपमा निष्कृय पारेको छ।
महानगरपालिकास्थित व्यस्त सडक किनारमा बेवारिसे अवस्थामा राखिएको उक्त वस्तु देखेपछि स्थानीयवासीले तत्काल प्रहरीलाई खबर गरेका थिए।
सूचना प्राप्त हुनासाथ नेपाल प्रहरी र सशस्त्र प्रहरी बलको टोली घटनास्थलमा पुगेको थियो र सम्भावित जोखिमलाई ध्यानमा राख्दै क्षेत्रलाई घेरा हालेर सर्वसाधारणको आवतजावत नियन्त्रण गरिएको थियो।

उक्त वस्तु बम हुन सक्ने आशंकामा मोरङमा तैनाथ नेपाली सेनाको श्री शिवदल गण बाट बम डिस्पोजल टोलीलाई घटनास्थलमा बोलाइएको थियो।
सेनाको विशेषज्ञ टोलीले आवश्यक सुरक्षा सतर्कता अपनाउँदै प्राविधिक जाँचपछि उक्त शंकास्पद वस्तुलाई सुरक्षित रूपमा डिस्पोज गरेको जनाएको छ।
घटनापछि अवस्था सामान्य बनाइएको छ भने सुरक्षाकर्मीले सर्वसाधारणलाई कुनै पनि शंकास्पद वस्तु देखिएमा तुरुन्तै सम्बन्धित निकायलाई जानकारी गराउन आग्रह गरेका छन्।