इनरुवा । सुनसरीको इनरुवा नगरपालिका–३ स्थित सखुवागाछी चोकबाट प्रहरीले ठूलो परिमाणमा गाँजा बरामद गरेको छ। आइतबार राति अस्थायी प्रहरी पोस्ट सखुवागाछी र ट्राफिक प्रहरी कार्यालय इनरुवा, सुनसरीबाट संयुक्त रूपमा खटिएको प्रहरी टोलीले पूर्वबाट पश्चिमतर्फ जाँदै गरेको ना.७ ख १८२५ नम्बरको ट्रकलाई शंकास्पद रूपमा रोकी चेकजाँच गरेको थियो।

चेकजाँचका क्रममा ट्रकमा बन्दा गोभीले छोपेर राखिएका ८३ वटा बोरा फेला परेका थिए। बोराभित्र गाँजाजस्तो देखिने पदार्थ भेटिएपछि प्रहरीले नियन्त्रणमा लिएर तौल गर्दा कुल २ हजार ५ सय ६६ किलो ५ सय ६० ग्राम रहेको पाइएको जिल्ला प्रहरी कार्यालय सुनसरीले जनाएको छ।

प्रहरीले ट्रकसहित चालक र सहचालकलाई नियन्त्रणमा लिएर जिल्ला प्रहरी कार्यालय सुनसरीमा ल्याएको छ। पक्राउ पर्नेमा धनकुटाको शहीदभूमि गाउँपालिका–२ का ३३ वर्षीय राजु राई (चालक) र सोही स्थानका १८ वर्षीय सन्दिप राई (सहचालक) रहेका छन्। घटनाबारे जिल्ला प्रहरी कार्यालय सुनसरीबाट थप अनुसन्धान भइरहेको प्रहरीले जनाएको छ।