काठमाडौं । ताप्लेजुङबाट प्रतिनिधि सभा सदस्य निर्वाचित क्षितिज थेबेले शपथ ग्रहणसँगै आफ्नो पहिलो महिनाको तलब शिक्षा क्षेत्रमा लगाउने घोषणा गरेका छन्।

सांसद थेबेले शुक्रबार प्रतिनिधि सभा सदस्यको औपचारिक शपथ लिएका थिए। शपथ ग्रहण पश्चात् उनले आफ्नो तलब सिदिङवा गाउँपालिका-३ स्थित आगेपा आधारभूत विद्यालयको जग्गा खरिद र भवन निर्माणमा सहयोग गर्ने प्रतिबद्धता व्यक्त गरे।

थेबेले भने, “ताप्लेजुङका जनताको प्रतिनिधित्व गर्दै आज प्रतिनिधि सभा सदस्यको रूपमा औपचारिक शपथ लिएँ। मेरो पहिलो महिनाको तलब विद्यालय भवन निर्माण र आवश्यक जग्गा खरिदमा सहयोग गर्ने निर्णय गरेको छु।”

सांसदले शिक्षामा गरेको यो प्रारम्भिक योगदानले बालबालिकाको दीर्घकालीन लाभ र उज्ज्वल भविष्य निर्माणमा सकारात्मक भूमिका खेल्ने विश्वास व्यक्त गरे। साथै, उनले आफूलाई निर्वाचित गराएर संसदसम्म पुर्‍याउने ताप्लेजुङवासीप्रति आभार समेत प्रकट गरेका छन्।