विराटनगर । सुनसरी, मोरङ र धनकुटा जिल्लाका विभिन्न स्थानबाट प्रतिबन्धित औषधि र लागू औषध ब्राउन सुगरसहित ५ जनालाई पक्राउ गरिएको छ ।

साउन १८ गते सुनसरीको धरान उपमहानगरपालिका–११ बानडाँडा लाइनस्थितबाट इलाका प्रहरी कार्यालय धरानबाट खटिएको प्रहरी टोलीले धरान–११ का ३१ वर्षीय डिकेन्द्र लिम्बु र धनकुटाको पाख्रिबास नगरपालिका–५ का २० वर्षीय प्रजोल राईलाई प्रतिबन्धित औषधि डाइसाइक्लोमिन ९०० ट्याब्लेट र ट्रामोल ९०० ट्याब्लेट सहित पक्राउ गरिएको कोसी प्रदेश प्रहरी कार्यलय विराटनगरले जनाएको छ।

यसैगरी, सोही दिन सुनसरीको इनरुवा नगरपालिका–१० टोकी नहर चोकस्थितमा जाल्पापुरबाट टोकीतर्फ आउँदै गरेका मोटरसाइकलमा सवार दुई जना अपरिचित व्यक्तिले अस्थायी प्रहरी चौकी साम्बलाबाट खटिएको प्रहरी टोलीलाई देख्नासाथ झोला नालीमा फाली मोटरसाइकल फर्काई फरार भएका थिए ।

उक्त झोलाभित्र प्रतिबन्धित औषधि स्पास ५ हजार ट्याब्लेट र ट्रामोल ५ हजार ट्याब्लेट फेला परेको तथा फरार मोटरसाइकल सवार व्यक्तिहरूको खोजतलास भइरहेको छ ।

त्यसैगरी, मोरङको जहदा गाउँपालिका–६ पोखरियास्थितबाट इलाका प्रहरी कार्यालय पोखरियाबाट खटिएको प्रहरी टोलीले कटहरी गाउँपालिका–७ का २१ वर्षीय श्रवण खडियारी र सोही स्थानका २० वर्षीय सविन उराँवलाई प्रतिबन्धित औषधि निट्राजेन १० ट्याब्लेट र एसपीएम प्राक्सा ३ ट्याब्लेट सहित नियन्त्रणमा लिएको छ ।

यस्तै, धनकुटाको धनकुटा नगरपालिका–१ हिले–पाख्रिबास सडकखण्डबाट प्रहरी चौकी हिलेबाट खटिएको प्रहरी टोलीले पाख्रिबास नगरपालिका–७ मुगाका ३२ वर्षीय हरी तामाङलाई १ ग्राम ब्राउन सुगर सहित पक्राउ गरेको छ ।
पक्राउ परेका व्यक्तिहरूमाथि थप अनुसन्धान भइरहेको छ ।