विराटनगर । उपचारका क्रममा निधन भएका रवीन्द्र मेहताका परिवारसँग गृहमन्त्री सुधन गुरुङले वार्ता सुरु गरेका छन्।

गृह मन्त्रालयका अनुसार महाराजगञ्जस्थित त्रिभुवन विश्वविद्यालय शिक्षण अस्पतालमा गृहमन्त्री गुरुङ र मृतकका परिवारबीच छलफल भइरहेको छ।

२२ वर्षीय मेहता साउन १० गते राति कोशी प्रदेशको सुनसरीस्थित देवानगञ्ज गाउँपालिका-३, कप्तानगञ्जमा भएको घटनामा घाइते भएका थिए। उपचारका लागि शिक्षण अस्पतालमा भर्ना गरिएका उनको मंगलबार उपचारकै क्रममा निधन भएको हो।

यसअघि गृहमन्त्री गुरुङले सोही दिन हिन्दू र मुस्लिम समुदायका नेताहरूसँग छुट्टाछुट्टै छलफल गरेका थिए।

गृह मन्त्रालयमा आयोजित भेटघाटमा दुवै समुदायका प्रतिनिधिसँग पछिल्लो समय मुलुकका विभिन्न क्षेत्रमा देखिएको अवस्था, शान्ति-सुरक्षा, सामाजिक सद्भाव तथा उत्पन्न विवादका विषयमा छलफल भएको गृहमन्त्रीको सचिवालयले जनाएको छ।

सरकारले घटनासँग सम्बन्धित पक्षसँग संवादलाई निरन्तरता दिँदै शान्ति, सुरक्षा र सामाजिक सद्भाव कायम राख्न आवश्यक पहल अघि बढाइरहेको जनाएको छ।