इलाम । जिल्ला प्रशासन कार्यालय, इलामले जिल्लावासीलाई उच्च सतर्कता अपनाउन आग्रह गरेको छ।
जल तथा मौसम विज्ञान विभागको पूर्वानुमानलाई आधार मान्दै मंगलबार दिउँसो मुसलधारे वर्षाको सम्भावना रहेको भन्दै प्रशानले उच्च सतर्कता अपनाउन आग्रह गरेको हो ।

प्रशासनले जारी गरेको अत्यावश्यक सूचनाअनुसार श्रावण २० गते दिउँसो १ बजेदेखि ३ बजेसम्म भारी वर्षा हुन सक्ने पूर्वानुमान रहेकाले अचानक बाढी, पहिरो, भू–कटान, गेग्रान बहाव तथा डुबानको जोखिम बढ्न सक्ने जनाएको छ।

प्रशासनले अत्यावश्यक कामबाहेक घर वा सुरक्षित बासस्थानबाट बाहिर ननिस्कन, वर्षाका बेला अनावश्यक यात्रा नगर्न तथा भारी वर्षा भइरहेका अवस्थामा सवारीसाधन सुरक्षित स्थानमा रोकी जोखिम कम गर्न आग्रह गरेको छ।

खोला, खहरे, नदी किनार, पहिरोको जोखिम भएका बस्ती तथा डुबान प्रभावित क्षेत्रका बासिन्दालाई विशेष सावधानी अपनाउन र आवश्यक परे स्थानीय तह तथा सुरक्षा निकायसँग समन्वय गरी सुरक्षित स्थानमा बस्न प्रशासनले अनुरोध गरेको छ।

जोखिमयुक्त क्षेत्रमा बसोबास गर्ने व्यक्ति तथा परिवारलाई आवश्यक परे सुरक्षित स्थानमा स्थानान्तरण गर्नुपर्ने अवस्था आउन सक्ने भएकाले सम्बन्धित निकायलाई पूर्वतयारी अवस्थामा रहन पनि निर्देशन दिइएको छ।

विपद्को अवस्थामा राष्ट्रिय आपत्कालीन कार्यसञ्चालन केन्द्रको हेल्पलाइन १२३४, नेपाल प्रहरीको १०० तथा सशस्त्र प्रहरी बलको १११४ नम्बरमा सम्पर्क गर्न प्रशासनले आग्रह गरेको छ।