विराटनगर । भारतीय प्रधानमन्त्री नरेन्द्र मोदीको भिडियो फेसबुकबाट हटाइएको घटनापछि मेटाका उच्च अधिकारीले भारत सरकारसँग छलफल गरेका छन् ।

मेटाका प्रमुख विश्वव्यापी मामिला अधिकारी जोएल काप्लानको नेतृत्वमा रहेको प्रतिनिधिमण्डलले बुधबार भारतको इलेक्ट्रोनिक्स तथा सूचना प्रविधि मन्त्रालयका सचिव एस. कृष्णनसँग नयाँ दिल्लीमा भेटवार्ता गरेको हो ।

भारतीय समाचार संस्था एएनआईका अनुसार करिब ४५ मिनेटसम्म चलेको छलफलमा मेटाका अधिकारीहरूले प्रधानमन्त्री मोदीको भिडियो त्रुटिवश हटाइएको भन्दै त्यसको कारणबारे सरकारलाई जानकारी गराएका थिए ।

मेटाका प्रतिनिधिले भारतका सूचना प्रविधि मन्त्री अश्विनी वैष्णवसँग पनि भेटवार्ता गर्ने सम्भावना रहेको बताइएको छ ।

यसैबीच, भारतीय संसदअन्तर्गत सञ्चार तथा सूचना प्रविधिसम्बन्धी स्थायी समितिले मेटाका प्रमुख कार्यकारी अधिकृत (सिइओ) मार्क जुकरबर्गले उक्त घटनाका विषयमा प्रधानमन्त्री मोदीसँग बिनासर्त माफी माग्नुपर्ने धारणा सार्वजनिक गरेको छ ।

समितिले यस्ता प्रकृतिका घटना पुनः दोहोरिए भारतमा मेटाले पाउँदै आएको कानुनी संरक्षणसमेत प्रभावित हुन सक्ने चेतावनी दिएको जनाएको छ ।