विराटनगर। अख्तियार दुरुपयोग अनुसन्धान आयोगले इलामको चुलाचुली गाउँपालिकामा कार्यरत इन्जिनियर डिल्ली राज खड्का र लेखा अधिकृत मिलन कुमार भट्टराईविरुद्ध ६ लाख रुपैयाँ घुस लिएको आरोपमा विशेष अदालतमा आरोपपत्र दायर गरेको छ।

आयोगका अनुसार पुलको रिडिजाइन स्वीकृत गराइदिने तथा ठेक्काको भुक्तानी प्रक्रियामा सहजीकरण गरिदिने भन्दै इन्जिनियर खड्काले सेवाग्राहीसँग घुस मागेका थिए। आयोगको टंगाल र इटहरी कार्यालयबाट खटिएको टोलीले खड्कालाई सेवाग्राहीबाट ६ लाख रुपैयाँ घुस लिइसकेको अवस्थामा नियन्त्रणमा लिएको थियो।

अनुसन्धानका क्रममा खड्का र लेखा अधिकृत भट्टराईको आपसी मिलेमतोमा पुलको डिजाइन, रिडिजाइन, थर्ड पार्टी भेरिफिकेसन तथा भुक्तानी प्रक्रियामा सहजीकरण गरिदिने भन्दै सेवाग्राहीसँग ६ लाख रुपैयाँ घुस मागेर लिएको पुष्टि भएको आयोगले जनाएको छ।

आयोगले दुवै जनाविरुद्ध भ्रष्टाचार निवारण ऐन, २०५९ बमोजिम ६ लाख रुपैयाँ बिगो कायम गरी बिगो बराबर जरिवाना र कैद सजायको मागदाबी गरेको छ। आयोगका प्रवक्ता सुरेश न्यौपानेका अनुसार आरोपपत्र विशेष अदालत, काठमाडौँमा दायर गरिएको हो।