काठमाडौँ । नेपाली कम्युनिष्ट पार्टीका संयोजक एवं पूर्वप्रधानमन्त्री पुष्पकमल दाहाल ‘प्रचण्ड’ले नेपालको राजनीतिक, आर्थिक, सामाजिक तथा सांस्कृतिक परिस्थिति चुनौतीपूर्ण बन्दै गएको बताएका छन् ।

शनिबार पार्टीको केन्द्रीय कार्यालय पेरिसडाँडामा जागरण अभियानको उद्घाटन गर्दै उनले नेपाली जनताले असहज परिस्थितिको सामना गरिरहेको बताए । रुस–युक्रेन युद्ध, इजरायल–प्यालेस्टाइन द्वन्द्व, इजरायल, अमेरिका र इरानबीचको युद्ध तथा युरोपका विभिन्न आन्दोलनले विश्वलाई प्रभावित पारिरहेको उनको भनाइ थियो ।

प्रचण्डले दोस्रो विश्वयुद्धपछि संयुक्त राष्ट्रसंघको स्थापनासँगै निर्माण गर्न खोजिएको विश्व व्यवस्था कमजोर हुँदै गएको र नयाँ व्यवस्था स्थापित भइनसकेको बताए । विश्व राजनीति सङ्क्रमणकालीन अवस्थाबाट गुज्रिरहेको उल्लेख गर्दै उनले यसको प्रभाव भू–राजनीतिमा समेत परेको बताए ।

दुई ठूला छिमेकीबीच अवस्थित नेपाल विश्व शक्तिहरूबीचको बढ्दो प्रतिस्पर्धा र बदलिँदो भू–राजनीतिक परिस्थितिबाट अछुतो रहन नसकेको उनको भनाइ थियो ।