काठमाडौं । नेपाली कांग्रेसले १५औँ महाधिवेशनमा सहभागी हुने महाधिवेशन प्रतिनिधिको शुल्क ३ हजार ५ सय रुपैयाँ निर्धारण गरेको छ। १८ असोजदेखि हुने महाधिवेशनका लागि प्रतिनिधि शुल्क तय गरिएको हो।

१५औँ महाधिवेशनमा अघिल्लो महाधिवेशनको तुलनामा २ हजारभन्दा बढी प्रतिनिधि सहभागी हुने भएका छन्। निर्वाचन समितिका अनुसार यसपटक करिब ७ हजार प्रतिनिधि हुनेछन्।

१४औँ महाधिवेशनमा ४७ सयभन्दा बढी प्रतिनिधि सहभागी भएका थिए। त्यतिबेला एक प्रतिनिधिसभा निर्वाचन क्षेत्रबाट २६ जना महाधिवेशन प्रतिनिधि चयन भएका थिए। यसपटक भने विधान संशोधन गरी एक निर्वाचन क्षेत्रबाट ३३ जना प्रतिनिधि चयन हुने व्यवस्था गरिएको छ। महाधिवेशन प्रतिनिधिका लागि होटल बुकिङ पार्टीले गर्नेछ। तर होटलमा बस्दा लाग्ने शुल्क भने प्रतिनिधि स्वयंले व्यहोर्नुपर्नेछ।