काठमाडौं । अमेरिकाले विदेशी विद्यार्थीले पढाइपछि काम गर्न पाउने ऐच्छिक व्यावहारिक प्रशिक्षण (ओपीटी) का लागि पहिलोपटक ७० हजार अमेरिकी डलर शुल्क प्रस्ताव गरेको छ।

अमेरिकी गृह सुरक्षा विभागका अनुसार ओपीटी नवीकरण गर्दा हरेकपटक ३० हजार डलर शुल्क लाग्नेछ। ओपीटीअन्तर्गत विद्यार्थीले अध्ययनसँग सम्बन्धित क्षेत्रमा एक वर्षसम्म काम गर्न पाउँछन् भने विज्ञान, प्रविधि, इन्जिनियरिङ र गणित विषयका विद्यार्थीले तीन वर्षसम्म काम गर्न सक्छन्।

अमेरिकी सरकारले भिसा कार्यक्रममा हुने ठगी र दुरुपयोग रोक्न तथा ओपीटीलाई सस्तो विदेशी श्रमको माध्यम बन्न नदिन शुल्क प्रस्ताव गरिएको जनाएको छ। प्रस्तावमाथि ६० दिनसम्म जनताले सुझाव दिन सक्नेछन्। नयाँ व्यवस्था लागू भएमा अमेरिकामा अध्ययन गर्न जाने विदेशी विद्यार्थी, विशेषगरी भारतीय विद्यार्थी प्रभावित हुन सक्ने देखिएको छ।