काठमाडौं । यस वर्षको मनसुन बुधबारदेखि नेपालका सबै भूभागबाट बाहिरिएको छ। मौसम पूर्वानुमान महाशाखाका अनुसार असोज २८ गते मनसुन पूर्ण रूपमा बाहिरिएको हो।

यस वर्ष मनसुन औसत समयभन्दा करिब १२ दिन ढिलो बाहिरिएको हो। नेपालबाट सामान्यतया अक्टोबर २ सम्ममा मनसुन बाहिरिने गर्छ।

महाशाखाका अनुसार असोज १७ गतेदेखि सुदूरपश्चिम, कर्णाली तथा लुम्बिनी र गण्डकी प्रदेशका पश्चिमी भूभागबाट मनसुन बाहिरिन थालेको थियो।

मनसुन सकिए पनि स्थानीय तथा पश्चिमी वायुको प्रभावका कारण केही स्थानमा मौसममा परिवर्तन आउन सक्ने महाशाखाले जनाएको छ।