काठमाडौं । अन्तर्राष्ट्रिय हानी नोक्सानी कोषले नेपाललाई २० मिलियन डलर अनुदान दिने भएको छ ।

कात्तिक ५ मा बसेको बोर्डको बैठकले नेपाललाई उक्त सहयोगको निर्णय गरेको कृषि वन तथा पर्यावरण मन्त्रालयले जनाएको छ ।

”नेपालको जलवायु वित्तमा यो निकै ठूलो सहयोग हो । नेपालको विपद्प्रति संवेदनशील हुँदै विश्वास गरेकोमा अन्तर्राष्ट्रिय समुदाय धन्यवादको पात्र छ,” मन्त्रालयले भनेको छ ।

नेपाल सरकारले अन्तर्राष्ट्रिय ‘हानी नोक्सानी कोष’ सँग आपत्कालीन कोष तत्काल उपलब्ध गराउन भदौ १५ मा पत्राचार गरेको थियो ।

अर्थमन्त्री डा स्वर्णिम वाग्ले र कृषि वन तथा पर्यावरणमन्त्री गीता चौधरीको संयुक्त हस्ताक्षरमा कोषको सञ्चालक समिति (बोर्ड) का सह–अध्यक्षहरूलाई सम्बोधन गर्दै आधिकारिक पत्र पठाइएको थियो । त्यसको डेढ महिनापछि कोषले अनुदानको निर्णय गरेको हो ।