वीरगन्ज । वीरगन्जको कोभिड अस्पतालमा उपचारका क्रममा एक संक्रमितको मृत्यु भएको छ । गण्डक स्थित अस्थायी कोभिड अस्पतालमा शुक्रबार बेलुकी वीरगन्ज महानगरपालिका वडा नम्बर १२ मुर्लीका ६० वर्षिय वृद्धको मृत्यु भएको हो ।

साउन २१ गते पीसीआर रिपोर्ट पोजेटिभ देखिएका ती वृद्धलाई ज्वरो आएपछि साउन २४ गते साँझ गण्डक स्थित कोभिड अस्पतालमा भर्ना गरिएको थियो । उनको उपचारकै क्रममा शुक्रबार बेलुकी ७ बजे मृत्यु भएको कोभिड अस्पतालका कोर्डिनेटर डाक्टर उदय नारायण सिंहले जानकारी दिए ।

योसँगै वीरगन्जमा कोरोनाका कारण मृत्यु हुनेको संख्या २६ पुगेको छ । साउनमा मात्रै २२ जनाको मृत्यु भएको हो । वीरगन्जमा अहिलेसम्म कोरोनाका कारण मृत्यु भएका २६ मध्ये पर्साका १९, बाराका ५ र रौतहटका १ जना हुन् । जेठ ३१ गते वीरगन्जको घण्टाघरमा वेवारिसे मृत भेटिएका एक संक्रमित युवकको भने हालसम्म पहिचान खुल्न सकेको छैन ।