ताप्लेजुङ । कोरोना संक्रमणका कारण ताप्लेजुङको फुङलिङ नगरपालिका(४ क्याम्पस लाइन टोलका दुई कोरोना संक्रमितको मृत्यु भएको छ। २४ घण्टाभित्र ८५ वर्षीय वृद्धा र ६० वर्षीय पुरुषको मृत्यु भएको हो।

स्वास्थ्य कार्यालय ताप्लेजुङका जनस्वास्थ्य अधिकृत प्रतिमा खरेलका अनुसार वृद्धाको शुक्रबार राति घरमै र पुरुषको शनिबार दिउँसो धरानस्थित बिपी कोइराला स्वास्थ्य विज्ञान प्रतिष्ठानमा उपचारका क्रममा मृत्यु भएको हो। कोरोना संक्रमण भएपछि ति पुरुषलाई केही दिनदेखि भेन्टिलेटरमा राखेर उपचार गरिदै आइएको थियो।

दुवै पहिले देखिनै मुटुरोगबाट ग्रसित रहेको खरेलले बताइन्। वृद्धालाई मुटुरोगको उपचारका क्रममा बिर्तामोडमा कोरोना संक्रमण पुष्टि भएको थियो। पुरुषलाई भने जिल्ला अस्पताल ताप्लेजुङले रेफर गरेपछि धरान लगिएको थियो।

मृतक वृद्धाको शनिबार परिवारले नै अन्त्येष्टि गरेका छन्। यसअघि पनि सोही टोलमा ५२ वर्षीय पुरुषको मृत्यु भएको थियो। हाल ताप्लेजुङमा २० जना कोरोनाका सक्रिय संक्रमित रहेको जनस्वास्थ्य अधिकृत खरेलले बताइन्।