ताप्लेजुङ । नेकपा एमालेका उपमहासचिव योगेश भट्टराई दुई पटक निर्वाचित ताप्लेजुङमा यस पटक क्षितिज थेवेले टिकट पाएका छन् ।

राष्ट्रिय युवा संघका अध्यक्षसमेत रहेका थेवे आइतबार टिकट बोकेर ताप्लेजुङतर्फ लागेको एमाले जिल्ला कमिटी ताप्लेजुङका सचिव एवं प्रचार विभाग प्रमुख सन्तोष चाम्लिङले जानकारी दिए । जिल्ला कमिटीका कार्यवाहक अध्यक्ष दिपेन्द्र पोमुले पनि थेवेले टिकट पाएको पुष्टि गरे । पोमुले भिडियो सन्देश जारी गर्दै थेवेलाई जिताउन पनि अपिल गरेका छन् ।

यसअघि एमालेले सार्वजनिक गरेको नाममा ताप्लेजुङ खाली राखिएको थियो ।

काठमाडौंमा उपचार तथा आराम गरिरहेका जिल्ला कमिटी अध्यक्ष डम्बरध्वज तुम्बाहाम्फेलाई आफूले टिकट पाएको जानकारी गराउँदै थेवेले मनोनयन दर्ता र चुनावी अभियानका लागि जिल्ला हिँडेको जानकारी गराएका थिए ।

सिरिजङ्गा गाउँपालिका-१ सिनाम घर भएका थेवे निवर्तमान सांसद उर्मिला थेवे र संविधानसभा सदस्य भूपेन्द्र थेवेका कान्छा छोरा हुन् । उनी एमाले अध्यक्ष केपी शर्मा ओलिका विश्वासपात्र हुन् ।

जिल्ला कमिटीको बैठकले उपमहासचिव भट्टराई, थेवे र कोशी प्रदेशका सांसद तिलकुमार मेन्याङ्बोको नाम सिफारिस गरेको थियो ।