काठमाडाैं । चिनियाँ नयाँ वर्ष २०२६ को अवसरमा आयोजित नेपाल–चीन मैत्रीपूर्ण फुटबल खेल कार्यक्रममा महिला, बालबालिका तथा ज्येष्ठ नागरिक मन्त्री श्रद्धा श्रेष्ठले दुई देशबीचको सम्बन्ध ऐतिहासिक रूपमा सौहार्दपूर्ण रहेको उल्लेख गर्दै खेलकुद र सांस्कृतिक गतिविधिले जनस्तरको कूटनीति मजबुत बनाउने भूमिका खेलेको बताएकी छन्।

कार्यक्रमकी प्रमुख अतिथिका रूपमा मन्तव्य दिँदै मन्त्री श्रेष्ठले नेपालस्थित चिनियाँ दूतावास र राष्ट्रिय खेलकुद परिषद्को सहकार्यमा आयोजना गरिएको कार्यक्रमलाई अर्थपूर्ण पहलको रूपमा उल्लेख गरिन्। उनका अनुसार खेलकुदले भाषा, भूगोल र राजनीतिक सीमाभन्दा माथि उठेर आपसी मित्रता, विश्वास र सहकार्य विस्तार गर्न सहयोग पुर्‍याउँछ।

उनले नेपाल–चीन सम्बन्ध शान्तिपूर्ण सहअस्तित्वका पाँच सिद्धान्त, सार्वभौमिकता र भौगोलिक अखण्डताको सम्मानमा आधारित रहेको बताउँदै विकास, पूर्वाधार, शिक्षा, संस्कृति, पर्यटन र जनस्तरीय आदान-प्रदानमार्फत सम्बन्ध थप प्रगाढ बन्दै गएको धारणा राखिन्।

मन्त्री श्रेष्ठले नेपालको विकास प्रक्रियामा चीनबाट प्राप्त सहयोगप्रति कृतज्ञता व्यक्त गर्दै विशेषगरी पूर्वाधार विकास र २०१५ सालको भूकम्पपछिको मानवीय सहायता तथा पुनर्निर्माण सहयोग उल्लेख गरिन्। साथै, चिनियाँ पर्यटकले नेपालको पर्यटन प्रवर्द्धन र आर्थिक गतिविधिमा योगदान पुर्‍याइरहेको जनाउँदै लुम्बिनी र सगरमाथालगायत गन्तव्य भ्रमणका लागि चिनियाँ नागरिकलाई आमन्त्रण गरिन्।

चिनियाँ नयाँ वर्षलाई नवीकरण, सद्भाव र आशाको प्रतीकका रूपमा व्याख्या गर्दै उनले नेपालमा पछिल्ला वर्षहरूमा लालटिन महोत्सव, ड्रागन बोट उत्सवजस्ता सांस्कृतिक कार्यक्रम लोकप्रिय बन्दै गएको उल्लेख गरिन्। यस्ता कार्यक्रमहरूले दुई देशका समुदायबीच आपसी समझदारी र निकटता बढाएको उनको भनाइ थियो।

उनले सांस्कृतिक र खेलकुद कूटनीतिलाई जनस्तरीय सम्बन्ध विस्तारको प्रभावकारी माध्यमका रूपमा प्रस्तुत गर्दै युवाहरू, महिला खेलाडी, बालबालिका र ज्येष्ठ नागरिकलाई समेट्ने संयुक्त कार्यक्रम तथा आदान–प्रदानलाई विस्तार गर्नुपर्ने आवश्यकता औँल्याइन्। आगामी दिनमा संयुक्त प्रतियोगिता, युवा तथा आधारभूत तहका खेल गतिविधि, महिला खेलाडी आदान–प्रदान र समावेशी पहलमार्फत सहकार्य अझ विस्तार हुने अपेक्षा उनले व्यक्त गरिन्।

कार्यक्रमको अवसरमा मन्त्री श्रेष्ठले चिनियाँ नयाँ वर्ष २०२६ का लागि नेपाल र चीन दुवै देशका जनताप्रति सुस्वास्थ्य, सुख र समृद्धिको शुभकामना व्यक्त गर्दै दुई देशबीचको मित्रता दीर्घकालसम्म सुदृढ रहोस् भन्ने कामना गरिन्।

यसै सन्दर्भमा उनले आगामी राष्ट्रिय निर्वाचन सफल बनाउन सबै सरोकारवालाको भूमिका महत्वपूर्ण रहेको उल्लेख गरिन्। निष्पक्ष, समावेशी र शान्तिपूर्ण निर्वाचन लोकतान्त्रिक व्यवस्थाको आधार भएको भन्दै नागरिक, राजनीतिक दल, नागरिक समाज र युवाहरूलाई जिम्मेवार सहभागिताका लागि आग्रह गरिन्।