ताप्लेजुङ । फागुन २१ गते सम्पन्न प्रतिनिधिसभा सदस्य निर्वाचनमा ताप्लेजुङबाट निर्वाचित क्षितिज थेबेले सोमबार प्रसिद्ध तीर्थस्थल पाथीभरा देवीको दर्शन गरेका छन् ।

चुनावमा निर्वाचित भएपछि आइतबार मतदातालाई धन्यवाद दिन सदरमुकाममा धन्यवाद र्‍यालीको आयोजना गरेका थेबेले सोमबार विहानै पाथीभरा पुगेर देवीको दर्शन गर्दै पाथीभरा क्षेत्रको अवलोकन गरेका हुन् ।

पर्यटन विकासका विषयमा आफ्नो प्रतिबद्धतामा पहिलो बुँदामा पाथीभरा क्षेत्रलाई राखेका उनले पाथीभराको विकास र यस क्षेत्रमा पर्यटनका साथै तीर्थयात्रीको चाप बढाउनका लागि गर्न सकिने सम्भावित विषयका विषयमा पनि अध्ययन गरेको पाथीभरा क्षेत्रविकास समितिले जनाएको छ ।

यसैबिच साँझ सदरमुकाम फुङ्लिङमा जिल्लाका सञ्चारकर्मीसँगको भेटघाटमा बोल्दै उनले अब आफ्नो कार्यकालमा जिल्लाका लागि गर्न सक्ने सबै काममा सक्रियतापूर्वक लाग्ने बताए ।

आफ्नै पार्टीको सरकार नहुँदा ल्याउने बजेट र जिल्लामा भित्र्याउने योजनामा केही फरक पर्ने अनुमान गरेका उनले अबको समय जिल्लाको आवाज बनेर लाग्ने प्रतिबद्धता जनाए ।