बाँके । नेपालगन्जमा बजार अनुगमनका क्रममा ग्यास लुकाएर राखेको आरोपमा एक किराना पसललाई रु। ५० हजार जरिवाना गरिएको छ।

बाँकेका सहायक प्रमुख जिल्ला अधिकारी महेशकुमार गुरुङको नेतृत्वमा गएको अनुगमन टोलीले नेपालगन्ज–११ स्थित शङ्कर दयाल बद्रीप्रसाद प्रोभिजन स्टोरलाई जरिवाना गरेको हो।

“ग्यास लुकाएर राखेको भन्ने सूचना आएपछि हामी त्यहाँ पुग्दा ग्यास भेट्टाएका थियौँ,” सहायक प्रमुख जिल्ला अधिकारी गुरुङले भने। उनका अनुसार अनुगमनका क्रममा उक्त किराना पसलमा १३ वटा ग्यास सिलिन्डर लुकाएर राखिएको अवस्थामा भेटिएको थियो। उपभोक्ता संरक्षण ऐन, २०७५ अनुसार पसललाई रु। ५० हजार जरिवाना गरिएको हो।

अनुगमन टोलीले उक्त किराना पसलबाट अखाद्य सामग्रीसमेत फेला पारेको जनाएको छ। बजारमा ग्यासलगायत उपभोग्य सामग्रीमा अनियमितता भइरहेको गुनासो बढेपछि स्थानीय प्रशासनको सक्रियतामा केही दिनयता बजार अनुगमन भइरहेको छ। पछिल्लो केही दिनदेखि नेपालगन्जमा खाना पकाउने ग्यासको अभावसमेत देखिँदै आएको छ।