काठमाडौँ। कोलम्बियामा सोमबार गएको ७.४ म्याग्निच्युडको शक्तिशाली भूकम्पमा परी मृत्यु हुनेको संख्या १३२ पुगेको छ। भूकम्पपछि सयौँ मानिस सम्पर्कविहीन रहेको विवरण सार्वजनिक भएको छ।

प्रारम्भिक विवरणमा कोलम्बियाली सरकारले १११ जनाको मृत्यु र ८७ जना घाइते भएको जनाएको थियो। पछिल्लो विवरणअनुसार कोलम्बियन एसोसिएसन अफ क्यापिटल सिटिजले मृतकको संख्या १३२ पुगेको र ५७० जना घाइते भएको जनाएको छ।

कोलम्बियन जियोलोजिकल सर्भिसका अनुसार यो चालु शताब्दीमा कोलम्बियामा अभिलेख भएको सबैभन्दा शक्तिशाली भूकम्प हो। भूकम्पबाट पश्चिमी क्षेत्रमा रहेका काली, पेरेइरा, क्विब्दो र मानिजालेस लगायतका सहर प्रभावित भएका छन्।

भूकम्पको कम्पन छिमेकी मुलुक इक्वेडर र पानामासम्म समेत महसुस गरिएको थियो। प्रभावित क्षेत्रमा उद्धार तथा क्षतिको विवरण संकलन गर्ने कार्य चुनौतीपूर्ण बनेको छ।

अमेरिकी भूगर्भ सर्वेक्षणका अनुसार भूकम्पको केन्द्रबिन्दु राजधानी बोगोटाबाट करिब ४०० किलोमिटर पश्चिममा पर्ने चोको क्षेत्रको सान होसे डेल पालमार आसपास रहेको थियो। भूकम्प जमिनको सतहबाट करिब १०७ किलोमिटर गहिराइमा गएको बताइएको छ।

मुख्य भूकम्पपछि केही घण्टामै कम्तीमा २१ वटा परकम्प रेकर्ड भएका छन्। लगातारका परकम्पका कारण प्रभावित क्षेत्रमा उद्धार तथा खोजी कार्यमा थप जोखिम सिर्जना भएको छ।