काठमाडौं । यमनका इरान समर्थित हुथी विद्रोहीहरूले साउदी अरबमाथि आक्रमण तीव्र बनाएपछि अमेरिकाले रियाधस्थित दूतावासबाट गैर–आकस्मिक कर्मचारी तथा उनीहरूका परिवारलाई देश छाड्न आदेश दिएको छ।

अमेरिकी विदेश मन्त्रालयका प्रवक्ता टमी पिगटका अनुसार हुथी आक्रमणबाट विमानस्थल, तेल पूर्वाधार तथा अन्य महत्त्वपूर्ण संरचनामा जोखिम बढेको छ।

यसैबीच, साउदी अरबले बुधबार कम्तीमा सातवटा ड्रोन निष्क्रिय पारेको जनाएको छ। शायबाह तेल क्षेत्रलाई लक्षित आक्रमणमा दुई विदेशी कामदारको मृत्यु भएको छ भने दुई जना घाइते भएका छन्।

बढ्दो सुरक्षा जोखिमलाई ध्यानमा राख्दै अमेरिकाले आफ्ना कर्मचारीलाई विमानस्थल प्रयोग गर्न विशेष अनुमति लिनुपर्ने व्यवस्था गरेको छ।

बेलायतले साउदीको रक्षा गर्न लडाकु विमान तैनाथ गर्ने जनाएको छ भने इजिप्टले पनि आवश्यक सहयोग गर्ने प्रतिबद्धता व्यक्त गरेको छ। यद्यपि, अमेरिकी राष्ट्रपति डोनाल्ड ट्रम्पले हुथीविरुद्ध प्रत्यक्ष सैन्य आक्रमण गर्ने निर्णय गरिसकेका छैनन्।