विराटनगर । सुनसरीको इनरुवाबाट ब्राउनसुगरसहित दुई जना पक्राउ परेका छन्। जिल्ला प्रहरी कार्यालय सुनसरी र अस्थायी प्रहरी पोस्ट इनरुवा बसपार्कबाट खटिएको संयुक्त प्रहरी टोलीले उनीहरूलाई नियन्त्रणमा लिएको हो।

प्रहरीका अनुसार कार्तिक १५ गते साँझ ४ बजे इनरुवा नगरपालिका–४ स्थित बसचोकमा पश्चिमबाट पूर्वतर्फ पैदल हिँडिरहेका दुई जनामाथि शंका लागेपछि प्रहरीले शरीर खानतलासी गरेको थियो।

खानतलासीका क्रममा उदयपुरको बेलका नगरपालिका–४ निवासी ३२ वर्षीय नबिन राईको मलद्वारमा लुकाएर ल्याइएको अवस्थामा १७.३५ ग्राम १७ ग्राम ३५० मिलिग्राम ब्राउनसुगरजस्तो देखिने पदार्थ फेला परेको प्रहरीले जनाएको छ।

घटनास्थलबाटै उनीसँगै रहेका सोही स्थानका २९ वर्षीय सुमन राईलाई समेत प्रहरीले नियन्त्रणमा लिएको छ। पक्राउ परेका दुवै जनालाई बरामद लागूऔषधसहित जिल्ला प्रहरी कार्यालय सुनसरीमा ल्याइएको छ। उनीहरूविरुद्ध लागूऔषधसम्बन्धी कसुरमा थप अनुसन्धान भइरहेको प्रहरीले जनाएको छ।