काठमाडौं । बंगालादेशकी पूर्वप्रधानमन्त्री शेख हसिना स्वदेश फर्किए उनीविरुद्ध मृत्युदण्डको फैसला कार्यान्वयन गरिने मुख्य अभियोजकले बताएका छन् ।

अभियोजक मोहम्मद अमिनुल इस्लामले पत्रकारहरूसँग कुरा गर्दै हसीनासँग अदालतको फैसला कार्यान्वयनको सामना गर्नुबाहेक अन्य विकल्प नरहेको समाचार एजेन्सी एएफपीले जनाएको छ । हसिनाले पनि आफू बंगलादेश फर्किएमा मृत्युदण्डको सजाय हुन सक्नेबारे जानकार रहेको एएफपीलाई बताएकी छन् ।

नोभेम्बर २०२५ मा ढाकास्थित एक अदालतले मानवताविरुद्धका अपराधमा दोषी ठहर गर्दै हसिनाको अनुपस्थितिमै मृत्युदण्डको सजाय सुनाएको थियो । हसिनाले भने उक्त मुद्दालाई ‘कानुनी प्रहसन’ भन्दै अस्वीकार गरेकी थिइन् ।

अभियोजक अमिनुल इस्लामका अनुसार, मृत्युदण्डको फैसलाविरुद्ध अपिल गर्ने कानुनी समयसीमा समाप्त भइसकेको छ । त्यसैले हसीनासँग अब फैसला चुनौती दिने कुनै कानुनी विकल्प बाँकी नरहेको उनको दाबी छ ।

विद्यार्थी नेतृत्वको आन्दोलनपछि सन् २०२४ अगस्टमा देश छाडेकी हसिना त्यसयता भारतमा निर्वासनमा बस्दै आएकी छन् । उनले आगामी डिसेम्बरमा बंगलादेश फर्किने योजना बनाएको बताइएको छ । समाचार एजेन्सी एपीका अनुसार, उनले नयाँ राहदानीका लागि समेत आवेदन दिएकी छन् ।

अभियोजक अमिनुल इस्लामले गम्भीर अपराधमा दोषी ठहर भएका व्यक्तिलाई राहदानी जारी गर्न सम्बन्धित निकायले अस्वीकार गर्न सक्ने बताएका छन् ।