धनगढी । बझाङमा अटो दुर्घटना हुँदा तीन जनाको मृत्यु भएको छ भने एक बालक बेपत्ता भएका छन्। बुंगल नगरपालिका–१० को टुमेडामा बिहान करिब साढे १० बजे नम्बर नखुलेको अटो दुर्घटना हुँदा तीन जनाको घटनास्थलमै मृत्यु भएको प्रहरीले जनाएको छ।
जिल्ला प्रहरी कार्यालय बझाङका प्रमुख प्रहरी नायब उपरीक्षक (डीएसपी) टेकबहादुर जोराका अनुसार दुर्घटनामा परी मृत्यु हुनेमा बुंगल नगरपालिका–१० की अन्दाजी ४० वर्षीया राजमति महरा, १५ वर्षीया तारा महरा र ६ वर्षीया डल्ली महरा रहेका छन्।

अटोमा सवार एक बालक भने दुर्घटनापछि बेपत्ता भएका छन्। उनको खोजी कार्य भइरहेको डीएसपी जोराले जानकारी दिए। दुर्घटनाको कारण खुल्न नसकेको प्रहरीले जनाएको छ।
