थाइल्यान्ड । थाइल्यान्डको पाटोङमा सोमबार बिहान चारतले व्यावसायिक भवनमा भीषण आगलागी हुँदा ११ जनाको मृत्यु भएको छ । १६ जना घाइते छन् ।
स्थानीय समयानुसार बिहान करिब ३ः३० बजे रेस्टुरेन्ट तथा भाडामा बस्नेहरूका निम्ति आवासीय सुविधा रहेको भवनमा आगलागी भएको त्यहाँको प्रहरीले जनाएको छ ।

आगलागी नियन्त्रणमा लिन दमकलकर्मीलाई करिब दुई घण्टा लागेको थियो । आगलागी नियन्त्रणमा लिएपछि भवनभित्र ११ जनाको शव फेला परेको प्रहरीले जनाएको छ । मृत्यु हुनेमा थाइल्यान्ड र म्यानमारका नागरिक छन् ।

आगलागीमा परी घाइते भएका १६ जनालाई उपचारका निम्ति अस्पताल लगिएको छ । उनीहरूमा धुवाँका कारण श्वासप्रश्वासमा समस्या तथा सिसा फुट्दा लागेको चोटपटक रहेको प्रहरीले जनाएको छ ।
आगलागीको कारणबारे अनुसन्धान भइरहेको छ । थाइल्यान्डमा विशेष गरी बार, रात्रि क्लब तथा मनोरञ्जनस्थलको सुरक्षा व्यवस्थाका विषयमा लामो समयदेखि प्रश्न उठाइँदै आएको छ ।
यसै वर्ष जुलाईमा राजधानी बैंककस्थित एक व्यस्त बारमा विद्युतीय सर्ट सर्किटका कारण आगलागी हुँदा करिब ४० जनाको मृत्यु भएको थियो ।
सन् २००९ को नयाँ वर्ष उत्सवका क्रममा बैंककस्थित सान्तिका क्लबमा आगलागी हुँदा ६७ जनाको मृत्यु हुनुका साथै २०० भन्दा धेरै मानिस घाइते भएका थिए ।
लगातारका यस्ता घटनाले थाइल्यान्डमा भवन तथा मनोरञ्जनस्थलको अग्निसुरक्षा र आपत्कालीन उद्धार व्यवस्थामाथि पुनः गम्भीर प्रश्न उठाइएको छ ।