काठमाडौं । फिफा विश्वकप २०२६ मा आज सोमबार कुल चार खेल हुनेछ । नेपाली समय अनुसार यीमध्ये केही खेलहरू जुन १५ मा ढिलोगरी र केही जुन १६ को बिहान हुनेछ ।

आज उपाधि दाबेदार युरोपेली टोली स्पेन यस विश्वकपमा पहिलोपटक मैदान उत्रिदैछ ।

पहिलो खेल समूह एचमा केप भर्डले स्पेनको सामना गर्न लागेको हो ।

युरोपेली फुटबलमा पावरहाउस मानिने स्पेनी टोलीले युवा र अनुभवी खेलाडीहरूको मिश्रणलाई मैदानमा उतार्नेछ । यो खेल सोमबार राति नेपाली समय अनुसार ९ः४५ बजे सुरु हुनेछ ।

केप भर्ड पहिलोपटक विश्वकपमा उत्रिन लागेको हो ।

स्पेनको फिफा वरीयता २ छ । केप भर्डको फिफा वरीयता ६७ छ । केप भर्डले विश्वकपको लागि छनोट भएर इतिहास रचेको थियो । यी दुई टोली पहिलोपटक आमनेसामने हुन लागेको हो ।

यस्तै, बेल्जियमले समूह जीमा इजिप्टको सामना गर्नेछ । बेल्जियम धेरै वर्षदेखि विश्वको शीर्ष टोलीहरू मध्ये एक हो, तर विश्वकप ट्रफी जित्न भने सकेको छैन । यी दुई टोलीबीचको खेल राति १२ः४५ बजे सुरु हुनेछ ।

यसैगरी, समूह एचको दोस्रो खेलमा उरुग्वे र साउदी अरेबिया आमनेसामने हुनेछन् । साउदी अरेबिया कतार विश्वकप २०२२ मा अर्जेन्टिनालाई हराउने टोली हो ।

उरुग्वे र साउदी अरेबिया दुईपटक आमनेसामने भएका छन्, जसमा उरुग्वेले एउटा खेल जितेको छ भने साउदी अरेबियाले अर्को खेल बराबरी खेलेको छ । यो खेल भोलि बिहान ३ः४५ बजे सुरु हुनेछ ।

यसैबीच, इरान राजनीतिक चुनौतीहरूका बीच अन्ततः अमेरिका आइपुगेको छ र आफ्नो पहिलो खेल न्युजिल्यान्डविरुद्ध खेल्न लागेको छ । खेल भोलि बिहान ६ः४५ बजे सुरु हुनेछ ।

इरानी टोली खेलको एक दिन अघि अमेरिका आइपुगेको हो । लस एन्जलस पुगेपछि इरानी टिमलाई सुरक्षा बढाइएको थियो ।

विगत केही महिनादेखि अमेरिका र इरानबीचको युद्ध तनावका कारण इरानको विश्कप यात्रा रोकिने चर्चा थियो ।