विराटनगर । विराटनगरमा सोमबार विहान प्रहरीले एक उद्योगीको कार्यालय र घरमा छापा मारेको प्रति नेपाल उद्योग परिसंघ (सीएनआई) कोशी प्रदेशले आपत्ती जनाएको छ ।

उद्योगी–व्यवसायीमाथि कमजोर सूचनाका आधारमा छापा मार्ने, सार्वजनिक रूपमा बदनाम गर्ने र लगानीकर्तालाई आतंकित बनाउने शैलीले निजी क्षेत्रको मनोबल घट्ने सीउनआई विज्ञप्तिमार्फत जनाएको हो । यस्ता गतिविधिले लगानी वातावरण थप कमजोर बनाउने परिसंद्धले चेतावनी पनि दिएको छ ।

परिसंघका अध्यक्ष पवनकुमार सारडाले कुनै पनि नागरिक वा संस्थामाथि कानुनबमोजिम अनुसन्धान गर्ने अधिकार राज्यलाई भए पनि त्यसको प्रयोग गर्दा संविधानले प्रत्याभूत गरेका मौलिक हक, गोपनीयताको अधिकार, मानवीय मर्यादा र सम्मानको पूर्ण संरक्षण हुनुपर्ने उल्लेख गरेका छन् ।

विराटनगरस्थित देवनरा ग्रुपका उद्योगी तथा परिसंघका वरिष्ठ उपाध्यक्ष प्रकाश मुण्दडाको निवास र कार्यालयमा ठूलो संख्यामा प्रहरी परिचालन गरी करिब साढे पाँच घण्टा खानतलासी गरिएको घटनाप्रति विज्ञप्तिमा गम्भीर आपत्ति जनाइएको छ ।

बिहानै घर घेराबन्दी गरी परिवारका सदस्यलाई मानसिक दबाबमा राख्ने र पर्याप्त आधार सार्वजनिक नगरी गरिएको कारबाहीले सम्पूर्ण उद्योगी–व्यवसायी समुदायको मनोबलमा नकारात्मक असर परेको परिसंघको भनाइ छ ।