काठमाडौँ । पत्रकार तथा जनआस्था साप्ताहिकका सम्पादक किशोर श्रेष्ठलाई सर्वोच्च अदालतमा उपस्थित गराउन आदेश दिइएको छ।

शुक्रवार सर्वोच्च अदालतका न्यायाधीश बालकृष्ण ढकालको एकल इजलासले श्रेष्ठकी श्रीमती सरस्वती श्रेष्ठले दायर गरेको बन्दी प्रत्यक्षीकरण रिटमाथि प्रारम्भिक सुनुवाइ गर्दै श्रेष्ठलाई भदौ १ गते बिहान १० बजे अदालतमा उपस्थित गराउन आदेश दिएको हो।

अदालतले श्रेष्ठलाई थुनामा राख्नु नपर्ने भए त्यसको आधार र कारणसहित लिखित जवाफ पेस गर्न विपक्षीका नाममा आदेशसमेत दिएको छ।

यसै गरी, प्रहरीले श्रेष्ठको घरबाट लगेको दुई वटा ल्यापटप तथा जनआस्था साप्ताहिकको कार्यालयबाट बरामद गरेको ६ वटा सिपियु, ल्यापटप, आई प्याड र मोबाइललगायत सामग्री समेत अदालतमा उपस्थित गराउन आदेश दिएको छ।

श्रेष्ठलाई वैयक्तिक गोपनीयतासम्बन्धी कसुर गरेको आरोपमा बुधवार साँझ प्रहरीले पक्राउ गरेको थियो। त्यसपछि काठमाडौँ जिल्ला अदालतले अनुसन्धानका लागि उनलाई तीन दिन हिरासतमा राख्न अनुमति दिएको थियो।

श्रेष्ठकी श्रीमतीले उनलाई गैर कानुनी रूपमा थुनामा राखिएको दाबी गर्दै बिहीबार सर्वोच्च अदालतमा बन्दी प्रत्यक्षीकरण रिट दायर गरेकी थिइन्।

सर्वोच्चको आदेशपछि अब भदौ १ गते हुने सुनुवाइमा श्रेष्ठको हिरासत कानुनी रूपमा उचित छ वा छैन भन्ने विषयमा थप सुनुवाइ हुने भएको छ।