काठमाडौं । नेपाली कम्युनिष्ट पार्टीकी नेतृ पम्फा भुसालले पार्टीका ‘जम्बो’ कमिटीले संगठनलाई बलियो बनाउन नसक्ने बताएकी छन्।

शनिबार कोशी प्रदेश समितिले आयोजना गरेको पार्टी एकता तथा प्रशिक्षण कार्यक्रममा उनले अत्यधिक ठूलो संगठनका कारण सदस्यबीच प्रभावकारी संवाद हुन नसकेको बताइन्। मंसिरमा हुने महाधिवेशनबाट चुस्त–दुरुस्त कम्युनिष्ट पार्टी निर्माण गर्नुपर्ने उनको भनाइ छ।

भुसालले पार्टीमा पदप्रतिको मोह बढ्दै गएको भन्दै यसले कम्युनिष्ट आन्दोलन कमजोर बनेको दाबी गरिन्। पार्टी सदस्यता नवीकरण तथा संगठनात्मक एकताको कामसमेत ढिलो भइरहेको उनले बताइन्।

उनले राष्ट्रिय स्वाधीनता, संघीय लोकतान्त्रिक गणतन्त्र र संविधानको रक्षा गर्दै रक्षात्मक अवस्थामा पुगेको कम्युनिष्ट आन्दोलनलाई सुदृढ बनाउन वाम एकता आवश्यक रहेकोमा जोड दिइन्।