विराटनगर । कोशी प्रदेशसभाको बैठकमा विराटनगरका निजी आँखा अस्पताल बन्द गरिएको विषयमा पूर्व मुख्यमन्त्री केदार कार्कीले धारणा राख्ने क्रममा सभामुख अम्बरबहादुर विष्टले नियम र कार्यसूचीको विषय उठाएपछि बैठकमा केहीबेर सवाल जवाफ भएको छ।

कार्कीले आँखा अस्पताल बन्द गरिएको विषयमा धारणा राख्दै बोल्न खोजेका थिए। त्यस क्रममा सभामुख विष्टले उक्त विषय नियमअनुसार र बैठकको कार्यसूचीअनुसार नभएको भन्दै आपत्ति जनाएका थिए।

आँखा अस्पताल बन्द गरिएको विषय अहिले कोशी प्रदेशमा विवादित बनेको छ। मोरङ जिल्ला प्रशासन कार्यालय र कोशी प्रदेश स्वास्थ्य मन्त्रालयको संयुक्त अनुगमन टोलीले विराटनगरमा सञ्चालनमा रहेका सातवटा निजी आँखा अस्पताललाई मापदण्ड पूरा नगरेको भन्दै सिलबन्दी गरेको थियो।