विराटनगर । बाढी तथा पहिरोका कारण देशका विभिन्न जिल्ला स्थित प्रमुख राजमार्ग तथा सडक खण्डहरू प्रभावित भएका छन्। नेपाल प्रहरीले सार्वजनिक गरेको आज बिहान ७ बजेसम्मको विवरणअनुसार रसुवामा बाढीका कारण मुख्य राजमार्गहरू पूर्ण रूपमा बन्द छन्। साउन १० गतेदेखि अवरुद्ध ती राजमार्ग अर्को सूचना नभएसम्मका लागि बन्द रहेको विवरणमा उल्लेख छ।

यस्तै, मनाङमा असोज १८ गते बाढी आएका कारण बेशीसहर हुँदै खाङसारसम्म जाने सडक खण्ड एकतर्फी भएको छ।

म्याग्दीको वेनि-जोमसोम सडक खण्ड अन्तर्गत रघुगंगा गाउँपालिका-२ बैसरी र अन्नपूर्ण गाउँपालिका-३ सुकेवगरमा पहिरोको कारण यातायात पूर्ण रूपमा अवरुद्ध भएको छ।

पूर्वी नवलपरासीको बुलिङटार गाउँपालिका–६ घुमाउरी घाटमा पहिरोले प्रभावित कालीगण्डकी करिडोर पनि एकतर्फी सञ्चालनमा छ। उक्त स्थानमा असोज १० गते बिहान ११ बजेर ३० मिनेटदेखि सडक अवरुद्ध भएको थियो।

त्यसैगरी, बौदीकाली गाउँपालिका–३ जन्ती पहिरोस्थित कालीगण्डकी करिडोरमा एकतर्फी आवागमन भए पनि ठूला सवारीसाधन जान नसक्ने अवस्था रहेको प्रहरीको विवरणमा उल्लेख छ। उक्त सडक असोज १४ गते अपराह्न ४ बजेर ४५ मिनेटदेखि पहिरोका कारण प्रभावित भएको थियो।