काठमाडौं – नेकपा एमालेकी सचेतक शान्ता चौधरीले कांग्रेस सांसद गगनकुमार थापाले संसदमा दिनुभएको अभिव्यक्तिमा आपत्ति जनाउनुभएको छ ।

स्वास्थ्यमा देखिएको समस्याका कारण एमाले अध्यक्ष केपी शर्मा ओलीले संसद्मा बसेर गर्नुभएको सम्बोधनलाई थापाले व्यंग्य गर्नुभएको थियो । यसमा आपत्ति जनाउँदै शान्ताले कुर्सीमा बसेको कुरालाई नकारात्मक ढंगले प्रस्तुत गरेको भन्दै प्रतिवाद गनुएभएको छ ।

स्वास्थ्यका कारणले बसेर सम्बोधन गरेको कुरालाई नकारात्मक ढंगले प्रस्तुत गर्नुले थापामा मानवता हराएको देखिएको उहाँको टिप्पणी छ ।

‘माननीय गगनजी तपाईंलाई म सम्मान गर्छु । तपाईप्रति नेपाली जनताले ठूलो आशा र भरोसा राखेको छ । तर तपाइँ आज प्रतिपक्षी नेता स्वास्थ्यमा समस्या आएपछि बसेर बोलेको कुरालाई नकारात्मक ढंगले संसदमा विरोधाभास ढंगले बोल्दा तपाईमा पनि गठबन्धनको मोहले मानवता हराउन लागेको हो कि भन्ने भान भयो,’ उहाँले भन्नुभएको छ ।