मोरङ । प्रदेश १ को मुख्य नेपाल–भारत नाका विराटनगर भन्सारमा कार्यरत चार कर्मचारीलाई कोरोना संक्रमण भएको छ ।

शुक्रबार पिसिआर परीक्षण गरिएका कार्यरत बीस कर्मचारीमध्ये चारजनालाई कोरोना संक्रमण भएको हो ।

उनीहरूको अवस्था सामान्य रहेको र सबैजना आइसोलेसनमा बसिसकेको भन्सार कार्यालयले जनाएको छ ।

‘हाइरिस्क’मा बसेर काम गरिरहेका कर्मचारीमा कोरोना संक्रमण पाइएपछि विराटनगर भन्सारमा थप उच्च सतर्कता अपनाइएकाे छ ।

विराटनगर भन्सार एजेन्ट संघका अध्यक्ष विजेन्द्र परासरले कोरोना संक्रमण पृष्टि भएपछि भन्सार जाँचपासमा कार्यालयसँगै आफूहरूले पनि सतर्कता अपनाएको बताए ।

उनका अनुसार आइतबारदेखि भन्सारमा भिडभाड नियन्त्रण गरिएको छ ।

एजेन्ट र उनीहरूका प्रतिनिधिहरूले पनि सकभर घरबाटै अनलाइनबाट काम गर्ने र अति आवश्यक परे मात्र भन्सारमा कागजात बुझाउन जाने गरेका छन ।