विराटनगर । प्रदेश १ सरकारले विराटनगरमा रहेको कोशी कोभिड १९ अस्पताललाई ‘लेभल टु’ मा स्तरोन्नती गर्ने भएको छ ।

कोरोना भाइरस (कोभिड १९)का लक्षण सहितका संक्रमित बढ्दै गएकाले थप जनशक्ति नियुक्त गर्ने र उपकरणको व्यवस्था गर्ने भएको हो ।

शुक्रबार बसेको प्रदेश १ मन्त्रिपरिषदको बैठकले विज्ञसँग छलफल र परामर्शको आधारमा उक्त निर्णय गरेको सरकारका प्रवक्ता समेत रहेका आन्तरिक मामिला तथा कानून मन्त्री हिक्मतकुमार कार्कीले जानकारी दिए ।

‘अस्पताललाई लेभल टु मा स्तरोन्नती गर्न आवश्यक दरबन्दी सिर्जना गरी नियुक्ति प्रकृया अघि बढाउन सामाजिक विकास मन्त्रालयलाई अनुमति दिएको छ,’ मन्त्री कार्कीले भने ‘ आइसियु र भेन्टिलेटर यो तहमा बढी थपिनेछ ।’

कोभिड १९ अस्पतालमा आवश्यक जनशक्ति नहुँदा आइसियु र भेन्टिलेटर सञ्चालनमा समस्या हुनुको साथै पर्याप्त आइसियु र भेन्टिलेटर पनि छैन ।

यस्तै शुक्रबार बसेको मन्त्रिपरिषद्को बैठकले प्रदेश सरकारको प्रदेशस्तरीय प्रयोगशाला स्थापना गर्न स्नातकोत्तर क्याम्पस विराटनगरको जग्गा प्रदेश प्रयोगशालाको नाममा पाप्त गर्नका लागि स्वीकृति दिएको छ ।

स्वीस सरकारले प्रदेश सरकारलाई हस्तान्तरण गरेको आधुनिक पीसीआर मेसिन सञ्चालन गर्न व्यवस्थित प्रयोगशालाको अभाव रहेको थियो ।

त्रिभूवन विश्वविद्यालय, सामाजिक विकास मन्त्रालय र स्नातकोत्तर क्याम्पस बिच यस अघि भएको सम्झौता बमोजिम उक्त निर्णय भएको मन्त्री कार्कीले बताए ।

बैठकले सामाजिक विकास मन्त्रालयको विविध कार्यक्रम सञ्चालन कार्यविधि २०७७ लाई स्वीकृत समेत गरेको छ ।

यस्तै उद्योग पर्यटन वन तथा वातावरण मन्त्रालयको प्रस्ताव अनुसार पर्यटन विकास तथा जलाधार संरक्षण आयोजनाको १ वर्ष म्याद थप गर्ने निर्णय पनि बैठकले गरेको मन्त्री कार्कीले बताए ।

उनका अनुसार बैठकमा कोरोना रोकथाम तथा नियन्त्रणको विषयमा केही अनौपचारिक छलफल पनि भएको थियो ।

https://www.facebook.com/litenepalbrt/videos/1370216579815632