विराटनगर । कोरोना भाइरस संक्रमित एक महिलाको विराटनगरमा शुक्रबार मृत्यु भएको छ। नोबेल शिक्षण अस्पताल पुर्‍याएको केही बेरमै विराटनगर महानगरपालिका–१२ बखरीकी ५५ वर्षीया महिलाको मृत्यु भएको हो।

अस्पतालका प्रबन्धक नारायण दाहालका अनुसार श्वास फेर्न गाह्रो भएपछि उपचारका लागि भनेर महिलालाई सिटी सफारीमा राखेर अस्पताल ल्याइएको थियो। आकस्मिक कक्षमै ४:३० बजेतिर मृत्यु भएपछि महिलालाई आइसोलेसनमा राखेर थप उपचार गर्न नपाइएको दाहालले बताए।

उनका अनुसार श्वासप्रश्वासमा समस्या हुने लगायत कोरोनासँग मिल्ने लक्षण देखिएपछि स्वाब संकलन गरेर बुधबार परीक्षणका लागि कोशी अस्पतालको प्रयोगशाला पठाइएको थियो।

बिहीबार रिपोर्ट पोजेटिभ आएपनि उनलाई ‘होम आइसोलेसन’मै राखिएको पाइएको उनले बताए। तर अचानक स्वास्थ्यमा समस्या थपिएपछि हतारहतार गरेर अस्पताल ल्याइएको भएपनि संक्रमित महिलालाई जीवितै राख्न नसकिएको दाहालले जानकारी दिए।

चिकित्सकलाई उद्रित गर्दै उनले दिएको जानकारी अनुसार महिलामा मधुमेह र बाथको पुरानै समस्या थियो।