विराटनगर । कोशी अस्पताल कोभिड–१९ उपचार केन्द्र विराटनगरमा कोरोना भाइरस संक्रमित एक जना वृद्धको मृत्यू भएको छ ।

बृद्ध पुरुषको मंगलबार बिहान मृत्यु भएको उपचार केन्द्रका व्यवस्थापक ज्ञानबहादुर बस्नेतले जानकारी दिए ।

बस्नेतका अनुसार मोरङको बूढीगंगा गाउँपालिका–५ का ७१ वर्षीय वृद्धको बिहान २ः१५ बजेतिर मृत्यु भएको हो ।

ती पुरुषको स्वाब संकलन गरेर पीसीआर परीक्षण गराउँदा असोज २४ गते रिपोर्ट पोजिटिभ आएको थियो । रिपोर्ट पोजिटिभ आएको भोलिपल्ट आइतबार उपचारका लागि अस्पतालको आइसोलेसनमा भर्ना गरिएको बस्नेतले बताए ।

वृद्धमा दमको पुरानै समस्या रहेको उपचार केन्द्रका प्रमुख एवं वरिष्ठ फिजिसियन डा. दीपक सिग्देलले बताए ।

बृद्धको अवस्था गम्भीर बन्दै गएपछि थप उपचारका लागि सोमबार साँझबाट भेन्टिलेटरमा राखिएको भए पनि बचाउन नसकिएको उनको भनाइ छ ।