विराटनगर । पछिल्लो समय संक्रमण तीव्र रुपमा फैलिइरहेको प्रदेश १ मा कोरोना भाइरसबाट संक्रमित हुनेको संख्या २५ हजार नाघेको छ। शनिबार थप एक सय ३५ नयाँ बिरामी थपिएपछि संक्रमितको संख्या २५ हजार ७६ पुगेको हो। संक्रमण पुष्टि भएकामध्ये २० हजार पाँच सय ८८ जनाको उपचार सफल भएको छ।

संक्रमण पुष्टि भएकाहरुको विभिन्न सरकारी, संस्थागत र होम आइसोलेसनमा उपचार भइरहेको थियो। उपचार सफल भएकाहरु कोरोनामुक्त हुँदै डिस्चार्ज भएका छन्। संक्रमण पुष्टि भएकामध्ये हालसम्म तीन सय २१ जनाको मृत्यु भइसकेको प्रदेशको सामाजिक विकास मन्त्रालयले जनाएको छ। संक्रमितमध्ये चार हजार एक सय ६७ जना उपचाररत छन्।

मन्त्रालयका अनुसार संक्रमित संख्या मोरङमा ११ हजार पाँच सय २६, सुनसरीमा सात हजार आठ ६५, झापामा तीन हजार तीन सय ७७ उदयपुरमा चार सय ४५ रहेको छ। इलाममा दुई सय ६३, पाँचथरमा एक सय छ, धनकुटामा एक सय ६८, तेह्रथुममा एक सय तीन, संखुवासभामा दुई सय २४, खोटाङमा ७८, भोजपुरमा ७१, सोलुखुम्बुमा २५, ओखलढुंगामा ४४ जनामा संक्रमण पुष्टि भएको छ। संक्रमितमध्ये सात सय २९ प्रदेश १ बाहिरका रहेका छन्।