ताप्लेजुङ । ताप्लेजुङमा कोरोना संक्रमण बढेसँगै मृतकको संख्या पनि थपिन थालेको छ । बुधबार विहान मात्रै दुई जनाले ज्यान गुमाएका छन् । एक जनाको संक्रमण या अन्य कारण मृत्यू भएको हो पुष्टि हुन बाँकिनै छ ।

बुधबार विहान मृत्यू हुनेमा फक्ताङलुङ गाउँपालिका ५ तापेथोक घर भई फुङ्लिङ बजारमा बस्दै आएका ५० पुरुष र फुङ्लिङ नगरपालिका ७ का एक युवक रहेका छन् । ५० वर्षिय पुरुषको कोरोना संक्रमणबाट मृत्यू भए पनि युवकको कारण खुलेको छैन ।

तापेथोकका पुरुषको गत जेठ १ गते एण्टिजेन रिपोर्ट पोजेटिभ आएको थियो । ती पुरुषमा मुटु सम्वन्धी समस्या पनि रहेको स्वास्थ्य कार्यालय ताप्लेजुङका कोभिड फोकल पर्सन हेमराज कठायतले जानकारी दिए । उनलाई अस्पतालबाट ३ गते होमआईसोलेशनमा बस्नको लागि पठाइएको थियो । होम आइसोलेसनमानै बसेका उनको बुधबार विहान मृत्यू भएको हो ।

फुङ्लिङका मृतक युवकमा पनि कोरोना सँग लक्षण मिल्दोजुल्दो देखिएका कारण उनको एण्टिजेन परिक्षणको तयारी भईरहेका बताईएको छ ।

यो सँगै ताप्लेजुङमा कोरोनाका कारण पुष्टि भएर ज्यान गुमाउनेको संख्या ७ पुगेको छ ।