काठमाडौं । राष्ट्रिय स्वतन्त्र पार्टी (रास्वपा) संसदीय दलका उपनेता गणेश पराजुलीले लिपुलेक क्षेत्रलाई लिएर भारत र चीनबीच भएको व्यापारिक सहमतिप्रति नेपालले आपत्ति जनाइसकेको बताएका छन्।

बुधबार संसदीय दलको बैठकपछि सञ्चारकर्मीहरूसँग कुरा गर्दै उनले नेपाललाई जानकारी नगराई गरिएको यस्तो द्विपक्षीय सम्झौता स्वीकार्य नहुने स्पष्ट पारेका हुन्।

उनका अनुसार सीमा विवादको विषयमा सरकारले आवश्यक गम्भीरता देखाउँदै कूटनीतिक पहल अघि बढाइसकेको छ र सम्बन्धित पक्षलाई कूटनीतिक नोट समेत पठाइएको छ।

पराजुलीले सीमा जस्तो संवेदनशील विषयमा उत्तेजनात्मक प्रतिक्रिया होइन, कूटनीतिक तथा राजनीतिक संवादमार्फत समाधान खोजिनुपर्नेमा जोड दिए।

उनले सरकारले यस विषयलाई अघि बढाउन आवश्यक तयारी गरिरहेको र संवादकै माध्यमबाट समाधान खोज्ने दिशामा प्रतिबद्ध रहेको जानकारी पनि दिए।

उनका शब्दमा, नेपाललाई औपचारिक जानकारी नदिई दुई छिमेकी राष्ट्रबीच भएको व्यापारिक समझदारी स्वीकार्य हुन नसक्ने र यसबारे सरकारले स्पष्ट अडानसहित कूटनीतिक प्रक्रिया अघि बढाइसकेको छ।

पराजुलीले सरकारको तर्फबाट पहल सुरु भइसकेकाले यस विषयमा थप राजनीतिक टिप्पणीभन्दा संवाद प्रक्रियालाई अघि बढ्न दिनु उपयुक्त हुने धारणा पनि व्यक्त गरेका छन्।